24 მარტს აშშ-ის სასამართლომ უნდა განიხილოს აშშ-ის გლობალური მედიის სააგენტოს წინააღმდეგ რადიო თავისუფალი ევროპა/ რადიო თავისუფლების (რთე/რთ) სარჩელი „გამოუსწორებელი ზიანის თავიდან ასაცილებლად“, მაუწყებლისთვის კონგრესის მიერ დამტკიცებული გრანტის შეჩერების გამო. ეს ზიანი დადგება რთე/რთ-სთვის კონგრესის მიერ განსაზღვრული გრანტის შეჩერებით - რაც ნაწილია სააგენტოს ძალისხმევისა, მაუწყებელს დაფინანსება შეუწყდეს.აშშ-ის კოლუმბიის საოლქო სასამართლო მხარეთა არგუმენტებს ადგილობრივი დროით 14:00 საათიდან მოისმენს. (თბილისის დროით ღამის 10 საათი).RFE/RL-ი პირველ ეტაპზე ითხოვს USAGM-მა - რომელიც ზედამხედველობს აშშ-ის ხელისუფლების მხარდაჭერით მოქმედ მედიასაშუალებებს, მათ შორის რადიო თავისუფლებასა და "ამერიკის ხმას" (VOA) - გაათავისუფლოს რადიო თავისუფლებისთვის განკუთვნილი 7,5 მილიონი ამერიკული დოლარი, რომელიც ფარავს 1 მარტიდან 14 მარტამის ჩათვლით პერიოდს - USAGM-მა 15 მარტს გამოაცხადა, რომ რადიო თავისუფლებას შეუწყვიტა კონგრესის მიერ დამტკიცებული გრანტი.სარჩელში ნათქვამია, რომ RFE/RL-სთვის კონგრესის მიერ განსაზღვრული გრანტის შეჩერება არღვევს ფედერალურ კანონებს და აშშ-ის კონსტიტუციას, რომლებიც კონგრესს ანიჭებენ საბოლოო უფლებამოსილებას ფედერალური ხარჯების გარშემო. სარჩელი ასევე მოიცავს სასამართლოსადმი თხოვნას დროებითი შემაკავებელი ორდერის (TRO) გაცემაზე, რათა გაიცეს მარტის დაფინანსება და შემცირდეს მაუწყებლისთვის მიყენებული ზიანი.RFE-ის სამართლებრივი ნაბიჯები ასევე ითვალისწინებს მთელი 2025 წლის საბიუჯეტო თანხების მოპოვებას - რომლებიც 30 სექტემბრამდეა განსაზღვრული. ამ ბალანსის თაობაზე წინასწარი მოსმენა აპრილის შუა რიცხვებშია დაგეგმილი."ჩვენი ფრილანსერებისთვის კონტრაქტების შეწყვეტა და ჩვენი თანამშრომლების უხელფასო შვებულებებში გაშვება მნიშვნელოვნად შეზღუდავს ჩვენს შესაძლებლობას, ცენზურის გარეშე ინფორმაცია მივაწოდოთ იმ 23 ქვეყანას, რომლებსაც ვემსახურებით", - ამბობს RFE/RL-ის პრეზიდენტი სტივენ კაპუსი სასამართლო სარჩელში, რომლითაც კომპანიისთვის დაფინანსების შეჩერების შედეგებია აღწერილი.RFE/RL-ის სარჩელი დასძენს: "სასამართლომ უნდა გასცეს RFE/RL-ის მიერ მოთხოვნილი, ზომიერი შემაკავებელი ორდერი, რათა თავიდან იყოს აცილებული გამოუსწორებელი ზიანის დადგომა პირველ წინასწარ განხილვამდეც".თავის მხრივ, USAGM განცხადებაში ამბობს, რომ საოლქო სასამართლო ამ საქმის განსახილველად არასწორი უწყებაა, და რომ კონგრესმა USAGM-ს მიანიჭა "ფართო უფლებამოსილება გრანტის მიმღებთა ზედამხედველობისთვის. მაშინაც კი, თუკი სასამართლოს ექნებოდა USAGM-ის შეხედულების გადაწონის იურისდიქცია, ეს არ მოემსახურებოდა საჯარო ინტერესს".აშშ-ის გლობალური მედიის სააგენტოს მიერ რადიო თავისუფლებ...